Мы же убо сиа слышавше[8] и видевше, подвигохомся преже, потом же надежу возложивше на неизреченныа судьбы Божиа, и благодаривше человеколюбие его, созвахом боголюбивыя епископы отечьства нашего, елици обретошася в тое время близ нас: ростовьскаго Ефрема, суздальскаго Аврамиа, рязаньскаго Иону, коломеньскаго Варлама, сарайскаго Иова, пермьскаго Герасима. Тако же и архимандритов, и игуменов, и прочих священноиноков и иноков земля нашея немало. И повелехом им възрети в таа божественая и священнаа правила святых апостол и богоносных отець, еже приахом от святыа великиа сборныя апостольскиа Божиа церкви гречьскиа вашего истиннаго православиа, и тое принесенные его от папы послание повелехом прочитати на мнозе. И явися всем нашим боголюбивым епископом русским и честнейшим архиманьдритом и преподобьным игуменом и прочим священноиноком и иноком и всему нашему православному христианьству, яко чюже есть и странно от божественых и священных правил Исидорово все дело и прихожение. И того ради писахом и посылахом к святому царю и к святейшему ти владычьству и ко всему божественому и священному[9] сбору послов наших, а с ними посылахом и тое писание папино, писано по латыне и по вашей гречьской грамоте, еже принесе к нам Исидор за папиною печятию. И просим святейшее ти влдычьство, да с святым царем, и со всем божественным и освященным сбором взревше в святаа ваша и божественая правила гречьскаа и во оно папино послание и рассудивше. И за нужу далечнаго и непроходнаго путю шествиа и за нахожение на наше христианьство безбожных агарян и за неустроение и мятежи, еже окрестных нас странах и господарей умножениа, свободно нам сотворите в нашей земли поставление митрополита. Еще же и за сию нужу, яко и духовнаа дела вся каждому православному христианину и наша скровенаа, а господьскаа потребнаа словеса и дела нужно нам делати с митрополитом толкованно младыми человеки, от них же лепо есть что таити, и тии преже инех уведают. И того ради просим святое ти владчьство, послете к нам честнейшее ваше писание яко да помощию Божиею и благодатию Святаго Духа и споспешением святаго царя и с благословением святаго ти владычьства и божественнаго и священнаго сбора с святым правилом собравше в отечествии нашем в Рустеи земли боголюбивыя епископы отечьства нашего и по благодати Святаго Духа исбравше кого человека добра мужа духовна, верою православнаа да поставять нам митрополита на Русь. Понеже и преже сего за нужу поставление в Руси митрополита бывало. А мы о всем хочем Божиею благодатию по изначяльству нашего православнаго христианьства посылание и совопрошание и любовь имети с святым царем и святейшаго ти благословениа и молитвы требовати и желати хощем, донележе Бог благоизволит и земля наша доколе имет стояти, а никако же разлучно от вас[10] имать быти наше православное христианство до века. Просим[11] же и о сем святое ти владычьство, да со извещением о всем и с честнейшем вашим писанием отпустите к нам сих наших послов неиздержно, да навыкше, о здравии и благопребывании святаго царя и святейшаго ти владычьства възвеселим ся духовне.
[1] В рукописи ошибочно: Мшамефа.
[2] В рукописи ошибочно: Мсамефа.
[3] В рукописи: о господства.
[4] В рукописи: пресвященнаго.
[5] Исправлено, в рукописи слово недописано: прия.
[6] В рукописи Ц исправлено из Ч, после слова зачеркнуто ошибочно написанное: и имь.
[7] Исправлено, в рукописи: Лятсякаго.
[8] Исправлено, в рукописи: слывше.
[9] Исправлено, в рукописи: священном.
[10] От вас в рукописи написано писцом на поле.
[11] Исправлено, в рукописи: проим.
Княз великый Василие московскый и всея Русии честнейшему в священоиноцехъ пастырю и учителю словеснаго стада Христова, освященной главе освященнаго дому пречистыя и царьския обители святыя горы Афона, господину отцу нашему, проту Пахомию, священоиноком же и старцем и всей яже о Христе братии, обретающимся в честней обители Святыя горы, яже о Христе достойное покланяние да въсприимет честная вы святыни
Прияхом убо, еже к нам посланное писание от вас о християнстей и непорочней вере в Христа и Господа нашего, и зело прославихом Бога, яко есте крепце стояще в преданном от апостол православии, яко истинная чада отцем, преже вас бывших, последуете, и нас посланием вашим утвержающи. Понеже бо, аще и далече есмы разстояния местом, но духовными крылы достизаете нас и любезно показуете, яко чада своя милующе, и иже в Христа и Бога нашего истинную веру сохранити утвержающе.
Пришедше же к нам иноци ясно известиша о вас, иже прежде бывших от скверных латын насилия на Святую гору, и веру инок онех неподвижну слышахом, судбам Божиим различно подивихомся, и нынейшему же их прещению и вашему великому смыслу, паче же крепости почюдихомся, яко поборником истинныя веры. Сего (ради) по достоинъству благодарим, понеже и нам не малу дръзость подасте сим посланием вашим, занеже бяху честную святыню вашу и благодать велию исповедуем многых душа якоже волны морскыя колеблющися, паче же простых сердца недоумеваахуся. Не бо когда таково же и в нашей стране еретичество всеяся или прозябе. Но бехом тако пребывающе благодатию Христовою в всяком православии светящеся, и свою веру, иже истинную яко зеницю ока храняще, верующе в Отца и Сына и Святаго Духа, Троицю единосущну и неразделиму: Отца безначална, Сына от тогоже рожденна, Духа святаго от Отца исходяща, от негоже благодать на всякой твари. Отчая же вины исхождение имети Дух мудрствующе, от Отца бо единаго Духу исходити, а не от Сына.
Не имеет бо ничтоже православная невеста Христова съборная церкви, разве еже прият от святых апостол и от седми собор вселенскых святых отец, съшедшихся и утвердивших истинную веру, от нихъ же прият иже благочестия поборник и хвалам достойный прародитель наш великый князь Владимер Кыевскый и всея Руси от съборныа церкви Царствующего града, паче же от самых апостол и богоносных отець, неизреченными же судбами Божиими, ими же сам един весть, ничтоже отлагающе, боящеся реченного: «Иже аще хто приложит или отложит, проклят да будет», его же не буди слышати нам! Страшно бо в истинну едину черту или сложение изменяти божественаго писания, колми же паче Божеству касающися, низлагающе Духу честь, якоже Македоний духоборець.
Мнози же митрополити преже сего быша в нас, когда греци, когда же ли отечьства нашего русини, и бяху вси съблюдающе веру благочестия даже и до сего дне, Исидора, егоже не лепо есть митрополитом звати, и якоже прииде в отечьствие наше, начать готовитися к съборному путя шествию. И колико возбраняхом и молихом его остатися събора оного, и не могохом утолити, ниже уставити помысль его. И глаголахом ему: «Аще ли идеши и пакы възвратишися к нам, ничтоже буди принося к нам ново и чужде съборныа церкви». Он же обещася нам.
Бывшю же тамо събору, его же недостойно есть събор нарицати, но детей игралище, имением любители сошедшеся, и не вемы откуду тамо возникоша соблазни, кый[12] ли враг истинне и благочестия супостат, иже таковых от благочестия премени. Егда бо подобаше силному стояти и немощного носити, глаголю же самодержца Царствующего града, иже бо и той самый столп златом пореваем поколебася. И в истинну глаголем, что сего падения лютейше! И в Царский град пришедше, таяже начаста, и единомудрена латыном на апостольстем престоле посадив зле, егоже болми змия ядовитаго блюстися подобааше.
Повем же вам, о святолюбное собрание, каковый змий приползе в отечьство наше, хотя яд свой излияти на православие наше, и с коликою гордостию прииде к нам, крест веляше носити пред собою, высоко въдружен латынъскым именованием, иное же и смирением покрываяся льстиваа она глава. Пришедше в великую нашу съборную церковь Пресвятыя Богородица и горестию ереси напився, не може утаитися плевелом сеятель. Егда лепо бе поминати патриарха Коньстянтина града, он же злочестне Еугения папу римскаго поминати начат, еже отреченна святыми и странна православныя нашия веры. К сим же и писания некая от съборища того к нам принесе, Духу святому от Отца и Сына исходити глаголаше, сквернен и блазнен, и главу презрев, яже от святых собор добре преданное яко от Отца единаго исходит Дух Святый, а не от Сына якоже и латина суемудръствует, сведетельствующу Иоанну Богослову, глаголющу, иже рече Господь учеником своим: «Егда приидет Дух истинный, иже от Отца исходит, тъй сведетельствует о мне». Сему же и инии евангелисти сведетельствуюше такоже.