Боляр же своих и вельмож жалуй и береги по их отечеству и службе и правде. Ко всем же князем, и княжатом, и детем боярским, и ко всему христолюбивому воинству буди приступен, и милостив, и приветен по царскому своему чину и сану. Всех же православных христиан блюди и жалуй и попечение имей о них от всего сердца. За обидимых же стой царски и мужески, не попускай и не давай обидети, и делай все по суду в правду. Се бо, о царю, принял еси от Бога скипетр правити хоругви великаго царства Российскаго, и разсудити и управити люди твоя в правду, блюди и храни бодренно от дикиих волков, губящих его, да не растлят стада христовых овец словесных, от Бога данна ти и врученнаго содержати скипетр по воли его святой, и по вашему исконному царскому жребию и отечеству того великаго Российскаго царствия. И паки глаголю ти, боголюбивый царю, блюди с Богом и храни, елико твоя царская власть и сила содержит, покрываем Вышняго десницею, и храним благодатию Святаго Духа ото всех твоих врагов видимых и невидимых, глаголет бо Господь Бог пророком: аз воздвигох тя царя правде, и приях тя за руку, и укрепих тя; сего ради слышите царие и князи, и разумейте, яко от Бога дана бысть держава вам, и сила от вышняго, вас бо Господь Бог в себе место избра на земли, и на свой престол вознес, посади, милость и живот положи у вас. Вам же подобает при сем же от Вышняго повеления, правление человеческаго рода православным царем, не токмо о своих пещися, и свое точию житие правити, но и все обладаемо от треволнения спасати, и соблюдати стадо Его от волков невредимо, но боятися серпа небеснаго, и не давати воли зло творящим человеком, иже душу с телом погубляюще. Якоже бо солнцу на земли не сущу, темно суть все, и не разсудно, сице и наказание души не сущи, размешенно все; едина бо точию добродетель от стяжания безсмертная суть. И паки ти глаголю, о Богом венчанный царю, цело имей мудрование православных догматов, почитай излишше матерь твою, Церковь, яже во Святем Дусе тя воздои, да и сам почтен будеши от нея; и священнический чин имей честно, и стыдися яко отца духовныя ходатая к Богу, честь бо священническая на Бога восходит такожде, и еже на них безчестие множае паче Бога прогневает. Языка же льстива и слуха суетна не приемли, царю, ниже оболгателя слушай, ни злым человеком веры емли, но разсуждай все по Бозе в правду, о Богом венчанный царю, яко всем человеком мудрость честнейши есть, вси бо ту, яко благо, похваляют, и любомудру ти быти подобает, и мудрым последовати, на них же во истину, яко на престоле Бог почивает. Не тако красная мира вся, яко же добродетель красит царя, но зри доброту духовную, и раздавай саны туне, а не на дарех продавай власти; еже бо ценою купивый власть, множае паче обла-даеми купуют, яко мздовоздаянию надеясь ко мздоприятию без боязни зрит. Аще бо и не приступен еси царю нижняго ради царства, но удобо приступен буди горния ради власти, но имаши и сам Царя, еже есть на Небесех. Аще бо Он всеми печется, яко Бог, сице потребно есть и тебе, царю, ничто же презирати. Тщися, о Богом венчанный царю, не точию сия царства исправити нравы благими, но Небесная наследовати добродетельными благодеяниями; и аще хощеши милостива к себе имети Небеснаго Царя и Бога, милостив буди и ты царю ко всем, да и зде добре и благо поживеши во веки веков, добрым царским слухом зде, а тамо славою со Ангелы божиими прежде втораго воскресения и страшнаго суда. Силою Творца, и премудростию Искупителя Сына, и Духа Святаго благодатию, возмогай, о благочестивый царю, о Христе и паки возмогай, да наследник будеши Небеснаго Царствия со всеми святыми православными цари; да возможеши со дерзновением рещи и во второе пришествие Господа Бога и Спаса нашего Иисуса Христа: се аз Господи и людие твои, ихже ми еси дал, великаго твоего царства Российскаго; и тогда, о благочестивый и Богом венчанный царю, и сам услышиши сладкий он глас Небеснаго Царя и Бога: благий Мой рабе, добрый и верный, российский царю Феодоре, о мале ми бысть еси верен, над многими тя поставлю, вниди в радость Господа своего; и тогда, царю, внидеши во Царство Небесное со всеми святыми, и приимеши неувядаемыя славы венец, по божественному Апостолу: их же око не виде, и ухо не слыша, и на сердце человеку не взыде, яже уготова Бог любящим Его; и тогда, Богом венчанный царю, против своих царских подвиг и трудов, приимеши от Бога мзду сторицею, и начнеши царствовати со Христом в Небесном Царствии, со Ангелы и со всеми святыми славити Бога в Троице певаемаго, и веселитися с ними в безконечные веки. Буди же с тобою Богом венчанным и православным царем и нам получити Царство Небесное, благодатию и человеколюбием Господа нашего Иисуса Христа, с ним же Отцу купно и Святому Духу честь и поклонение ныне и присно и во веки веков, аминь".
А потом святейший патриарх благословил царя крестом, и паки глагола ему: о, Богом венчанный великий государь, царь и великий князь Феодор Алексеевич, всея Великия и Малыя и Белыя России самодержец, буди на тебе милость Божия и Пречистыя Богородицы, и сила Честнаго и Животворящаго Креста, и великих чудотворцев и всех святых молитва и благословение, да и нашего смирения молитва и благословение, и всего Освященнаго собора Русския митрополии от ныне и до века, и во многие роды и лета, и умножит Господь Бог лет живота царства вашего, и узриши сыны сынов своих, и устроит, и возвысит Господь Бог царскую десницу твою над всеми твоими недруги и враги, и устроит Господь Бог царство твое мирно и вечно в род и род на веки. И вси людие рекоша: будет и будет многолетно, аминь.
А после поучения, царь и великий князь и патриарх снидоша с чертожнаго места. И патриарх соверша чин венчания, потом благословил царя и великаго князя крестом, и возведе царя на царское исконное место, еже уготовано на десной стране прежними великими государи, цари и великими князи.
А патриарх паки взыде на высокое чертожное место, а митрополитом, и архиепископом, и епископом повеле великаго царя благословити руками, и потом повеле начать часы и святую литургию. Благоверный же и Богом венчанный великий государь, царь и великий князь Феодор Алексеевич, всея Великия и Малыя и Белыя России самодержец, стоя всю обедню на царском месте, еже устроено искони.
И егда бысть выход со святым Евангелием, патриарх же сходит с высокаго места, и целует святое Евангелие, и пойде со властьми во святый олтарь по чину. Егда же нача ризничий чести святое Евангелие, и тогда царь и великий князь, сняв с себя царский венец, и поставил его на златом блюде болярину Иродиону Матвеевичу и, слушав со вниманием святаго Евангелия.
А егда прочте святое Евангелие ризничий, и принесе ко царю и великому князю; царь же и великий князь, сошед с царскаго своего места, целовал святое Евангелие, и поклонився, паки взыде на свое царское место, и царский свой венец приим, на главу паки возложи.
Егда на херувимской песни бывает выход, и тогда царь и великий князь, сняв с себя царский венец, и поставил его на златом блюде боярину же Родиону Матвеевичу, и поклонися трижды.
А после херувимской песни, приняв, святейший патриарх, трикир и дикир, и став в Царских Дверех, осенял государя, царя и великаго князя и весь царский сингклит, и всех православных христиан, по чину, крестобразно.
А потом пойде Богом венчанный великий государь, царь и великий князь Феодор Алексеевич, всея Великия и Малыя и Белыя России самодержец, к Царским Дверям по постланному пути прежнему; и егда прииде к Царским Дверям, и святейший Иоаким патриарх благословил царя и великаго князя крестом, и возложи на него цепь златую.
И потом царь и великий князь отъиде на свое царское место.
А егда речет святейший патриарх Христовы слова: приимите и ядите, сие есть Тело Мое, и тогда царь и великий князь, паки сняв с себя царский венец, и поставил его на златом блюде тому же боярину Родиону Матвеевичу, и поклонился до земли, и по достойне возложи на себя царский венец, и стоял в царском сану, и до помазания святаго и великаго мира, и до причастия святых и животворящих божественных христовых таин, во всю святую и божественную литургию. И егда диаки певчие начали петь киноник, и святейший Иоаким патриарх причастися святых божественных таин тела и крови Господа и Бога и Спаса нашего Иисуса Христа, таже причащал митрополитов, и архиепископов, и епископа, архимандритов и игуменов, протопопа и священник, и потом повеле отверзти Царския Двери. И тогда казначей и Казеннаго двора диаки постлаша от царскаго места, где царь и великий князь стоял, и до Царских Дверей царский путь, по нему же идти царю и великому князю, поверх сукна багрецу, атлас золот по червленной земле.
А перед Царскими дверьми у самого порогу, где царю помазатися святым миром, комнатной стольник Василий Змеев постлал поверх того царскаго пути сукон и бархатов, ковер шелков золотной, нов, чист, а на верх ковра возложил бархат золотной веницейской по червчатой земле. И святейший Иоаким, патриарх Московский и всея Руссии, посла ризничаго да черного диакона, призвати государя, царя и великаго князя к помазанию святаго и великаго мира, и ко причастию святых и животворящих таин.
Ризничий же и черный диакон изыдоша северными дверьми, и идоша к благочестивому царю и великому князю по десной стране уготованнаго царскаго пути оба вкупе, и пришед ко государю, царю и великому князю, поклонишася благочинно ниже пояса оба же вкупе, и глагола ризничий со всяцем благочинием:
"Благочестивейший государь, царь и великий князь Феодор Алексеевич! О Святем Дусе отец святейший Иоаким патриарх со всем Освященным собором призывает тя к помазанию святаго и великаго мира, и ко причастию святых и животворящих божественных христовых таин: гряди, государь о Святем Дусе с миром. И паки поклонишася царю по прежнему со всяцем благочинием и поидоша паки во святый олтарь теми же северными дверьми.