Пепел Аввакума стучит в наше сердце. Этот человек — и наша радость, и наша непроходящая боль. Такой уж человек случился в нашей истории и нашей литературе. Г. М. ПРОХОРОВ
ЖИТИЕ ПРОТОПОПА АВВАКУМА
Аввакум протопоп понужен бысть житие свое написати иноком <Епифаном*, понеж отец ему духовной инок, да не забвению предано будет дело Божие; и сего ради понужен бысть отцем духовным на славу Христу, Богу нашему. Аминь.> 1
[ВСТУПЛЕНИЕ]
Всесвятая Троице, Боже и содетелю всего мира! Поспеши и направи сердце мое начати с разумом и кончати делы благими, яже ныне хощу глаголати аз недостойный; разумея же свое невежество, припадая, молю ти ся и еже от тебя помощи прося: управи ум мой и утверди сердце мое приготовитися на творение добрых дел, да добрыми делы просвещен, на судище десныя ти страны причастник буду со всеми избранными твоими. И ныне, Владыко, благослови, да, воздохнув от сердца, и языком возглаголю* Дионисия Ареопагита «О божественных именех»*, что есть Богу присносущные имена истинные, еже есть близостные, и что виновные, сиречь похвальные. Сия суть сущие: Сый, Свет, Истинна, Живот; только четыре свойственных, а виновных много; сия суть: Господь, Вседержитель, Непостижим, Неприступен, Трисиянен, Триипостасен, Царь славы, Непостоянен, Огнь, Дух, Бог и прочая по тому разумевай.
Того ж Дионисия о истинне: «себе бо отвержение — истинны испадение есть, истинна бо сущее есть; аще бо истинна сущее есть, истинны испадение — сущаго отвержение есть; от сущаго же Бог испасти не может, и еже не быти — несть».
Мы же речем: потеряли новолюбцы существо Божие испадением от истиннаго Господа, святаго и животворящаго Духа. По Дионисию: коли уж истинны испали, тут и сущаго отверглись. Бог же от существа своего испасти не может, и еже не быти — несть того в нем: присносущен истинный Бог наш. Лучше бы им в символе веры не глаголати Господа, виновнаго имени, а нежели истиннаго отсекати, в нем же существо Божие содержится.
1 Текст, выделенный разрядкой, написан Епифанием и заключен им в круг. Он помещен на обороте листа, предшествующего автографу Аввакума. В автографе новой редакции В «вступлению» к «Житию» предшествуют фрагмент сопроводительного послания Аввакума некоему Алексею; выписки из поучения Дарофея о любви; собственноручный рисунок Аввакума с бранными подписями, карикатурно изображающий фигуры пяти основных врагов старообрядчества (патриарха Никона, митрополитов Павла и Илариона, греческих иерархов Паисия и Макария*); обращение Аввакума к читателям — «питомникам церковным»; новый вариант «понуждения» Епифания. Приводим два фрагмента из этих дополнительных текстов. (К местам, помеченным звездочкой (*), см. примечания в комментарии.)
[Из послания Аввакума Алексею]
Вото тебе, чадо мое возлюбленное, Алексей...* книга живота вечнаго*. Поминай мя в молитвах своих и старца не забывай Епифания: я писал, а он мне молитвами помогал. Над всем же сим благословит тя Господь, и Марью твою Пиминовну, и чад ваших, и снох, и внучаток, и сродников, и знаемых, и други, и другиня, и вся вас любящия. Еще же да будет всяк благословляли тя благословен, и проклинали тя — проклят. И да подаст ти Господь от влаги земныя и от росы небесных свыше*, и множа да умножит в дому твоем всяких красоты и благодати, и да ясте ветхая ветхих, и ветхая от лица новых изринете*, сиречь всего изообильно и с остатками; дай вам Господи и хлеба, и мяса, и ры(бы).., (текст обрывается) (л. 3 — 3 об.).
[Из обращения к читателям]
Вот вам, питомникам церковным, предлагаю житие свое от юности и до лет пятьдесят пяти годов*. Авва Дарофей описал же свое житие ученикам своим, понуждая их на таяжде — поучение 4, лис (т) 49*; и я такожде, убеждая вашу любовь о Христе Исусе, Господе нашем, сказываю вам деемая мною, непотребным рабом Божиим <....> (л. 2 об.).
Мы же, правовернии, обоя имена исповедаем: и в Духа Святаго, Господа истиннаго и животворящаго*, света нашего, веруем, со Отцем и с Сыном поклоняемаго, за него же стражем и умираем, помощию его владычнею.
Тешит нас Дионисий Ареопагит, в книге ево сице пишет: «сей убо есть воистинну истинный християнин, зане истинною разумев Христа и тем богоразумие стяжав, исступив убо себе, не сый в мирском их нраве и прелести, себя же весть трезвящеся и изменена всякаго прелестнаго неверия, не токмо даже до смерти бедствующе истинны ради, но и неведением скончевающеся всегда, разумом же живуще, и християне суть свидетельствуемы».
Сей Дионисий научен вере Христове от Павла апостола, живый во Афинах, прежде, даже не приитти в веру Христову, хитрость имый ищитати беги небесный*; егда ж верова Христови, вся сия вмених быти яко уметы*. К Тимофею пишет в книге своей, сице глаголя: «дитя, али не разумеешь, яко вся сия внешняя блядь ничто же суть, но токмо прелесть и тля и пагуба, аз пройдох делом и ничто ж обретох, но токмо тщету». Чтый да разумеет*. Ищитати беги небесныя любят погибающий, понеже любви ис~ тинныя не прияша, воеже спастися им; и сего ради послет им Бог действо льсти, воеже веровати им лжи, да суд приимут не веровавший истинне, но благоволиша о неправде. Чти Апостол, 275*.
Сей Дионисий, еще не приидох в веру Христову, со учеником своим во время распятия Господня быв в Солнечней граде*, и видев: солнце во тьму преложися и луна в кровь, звезды в полудне на небеси явилися черным видом*. Он же ко ученику глагола: «или кончина веку прииде, или Бог-Слово плотию стражет»; понеже не по обычаю тварь виде изменену: и сего ради бысть в недоумении. Той же Дионисий пишет о солнечном знамении, когда затмится: есть на небеси пять звезд заблудных, еже именуются луны. Сии луны Бог положил не в пределех, яко ж и прочий звезды, но обтекают по всему небу, знамение творя или во гнев, или в милость, по обычаю текуще. Егда заблудная звезда, еже есть луна, подтечет под солнце от запада и закроет свет солнечный, то солнечное затмение за гнев Божий, к людям бывает. Егда ж бывает, от востока луна подтекает, то по обычаю шествие творяще закрывает солнце.
А в нашей России бысть знамение: солнце затмилось в 162 году, пред мором за меняц или меныци*. Плыл Волгою-рекою архиепископ Симеон Сибирской*, и в полудне тьма бысть, перед Петровым днем недели за две; часа с три плачючи у берега стояли; солнце померче, от запада луна подтекала, по Дионисию, являя Бог гнев свой к людям: в то время Никон отступник веру казил и законы церковный, и сего ради Бог излиял фиал гнева ярости своея на Рускую землю*; зело мор велик был*, неколи еще забыть, вси помним.
Потом, минуй годов с четырнатцеть, вдругоряд солнцу затмение было; в Петров пост, в пяток, в час шестый, тьма бысть; солнце померче, луна подтекала от запада же, гнев Божий являя, и протопопа Аввакума, беднова горемыку, в то время с прочими остригли в соборной церкви власти и на Угреше в темницу, проклинав, бросили*. Верный разумеет, что делается в земли нашей за нестроение церковное. Говорить о том полно; в день века познано будет всеми; потерпим до тех мест.
Той же Дионисий пишет о знамении солнца, како бысть при Исусе Наввине во Израили. Егда Исус секий иноплеменники, и бысть солнце противо Гаваона, еже есть на полднях, ста Исус крестообразно, сиречь расл ростре руце свои, и ста солнечное течение, дондеже враги погуби. Возвратилося солнце к востоку, сиречь назад отбежало, и паки потече, и бысть во дни том и в нощи тридесеть четыре часа, понеже в десятый час отбежало; так в сутках десять часов прибыло. И при Езекии царе бысть знамение: оттече солнце вспять во вторый-на-десять час дня, и бысть во дни и в нощи тридесять шесть часов. Чти книгу Дионисиеву, там пространно уразумеешь*.
Он же Дионисий пишет о небесных силах*, росписует, возвещая, како хвалу приносят Богу, разделяйся деветь чинов на три троицы. Престоли, херувими и серафими освящение от Бога приемлют и сице восклицают: благословенна слава от места Господня!* И чрез их преходит освящение на вторую троицу, еже есть господства, начала, власти; сия троица, славословя Бога, восклицают: аллилуйя, аллилуйя, аллилуйя! По Алфавиту*, «аль» — Отцу, «иль» — Сыну, «уйя» — Духу Святому. Григорий Ниский* толкует: аллилуйя — хвала Богу; а Василий Великий* пишет: аллилуйя—ангельская речь, человечески рещи — слава тебе, Боже! До Василии пояху во церкви ангельския речи: аллилуйя, аллилуйя, аллилуйя! Егда же бысть Василий, и повеле пети две ангельския речи, а третьюю — человеческую, сице; аллилуйя, аллилуйя, слава тебе, Боже! У святых согласно, у Дионисия и у Василия; трижды воспевающе, со ангелы славим Бога, а не четыржи, по римской бляди; мерско Богу четверичное воспевание сицевое: аллилуйя, аллилуйя, аллилуйя, слава тебе, Боже! Да будет проклят сице ноюще.
Паки на первое возвратимся. Третьяя троица: силы, архангели, ангели; чрез среднюю троицу освящение приемля, поют: «свят, свят, свят, Господь Саваоф, исполнь небо и земля славы его!»* Зри: тричислено и сие воспевание*. Пространно пречистая Богородица протолковала о аллилуйи, явилася ученику Ефросина Псковскаго, именем Василию. Велика во «аллилуйи» хвала Богу, а от зломудрствующих досада велика,— по-римски святую Троицу в четверицу глаголют, Духу и от Сына исхождение являют*; зло и проклято се мудрование Богом и святыми. Правоверных избави Боже сего начинания злаго, о Христе Исусе, Господе нашем, ему же слава ныне и присно и во веки веком. Аминь.
Афанасий Великий рече: «иже хощет спастися, прежде всех подобает ему держати кафолическая вера, ея же аще кто целы и непорочны не соблюдает, кроме всякаго недоумения, во веки погибнет. Вера ж кафолическая сия есть, да единаго Бога в Троице и Троицу во Единице почитаем, ниже сливающе составы, ниже разделяюще существо; ин бо есть состав Отечь, ин — Сыновень, ин — Святаго Духа; но Отчее, и Сыновнее, и Святаго Духа едино Божество, равна слава, соприсносущно величество; яков Отец, таков Сын, таков и Дух Святый; вечен Отец, вечен Сын, вечен и Дух Святый; не создан Отец, не создан Сын, не создан и Дух Святый; Бог Отец, Бог Сын, Бог и Дух Святый — не три бози, но един Бог; не три несозданнии, но един несозданный, един вечный. Подобие: вседержитель Отец, вседержитель Сын, вседержитель и Дух Святый. Равне: непостижим Отец, непостижим Сын, непостижим и Дух Святый. Обаче не три вседержители, но един вседержитель; не три непостижимии, но един непостижимый, един пресущный. И в сей святей Троице ничтоже первое или последнее, ничтоже более или менее, но целы три составы и соприсносущны суть себе и равны». Особно бо есть Отцу нерождение, Сыну же рождение, а Духу Святому исхождение: обще же им, божество и царство.